ފުވައްމުލަކުންވެސް ވާދަކުރާ، ޗާލު ދިވެހިރާއްޖެ އެވޯޑަށް ވޯޓު ލުމުގެ ފުރުސަތު މިމަހު 15 އަށް ހަމަވާނެ

ޕަބްލިކް ސަރވިސް މީޑިއާ، ޕީއެސްއެމުން ރާއްޖޭގެ ރަށްރަށަށް އަމާޒުކޮށްގެން ތަޢާރަފްކުރި "ޗާލު ދިވެހިރާއްޖެ އެވޯޑް" އަށް ވޯޓުލުމުގެ ފުރުސަތު މިހިނގާ ނޮވެންބަރުމަހުގެ 15 އަށް ހަމަވާނެއެވެ.

މި އެވޯޑުގައި ހިމެނޭ 6 ކެޓަގަރީގެ ތެރެއިން "ދެމެހެއްޓެނިވި ތަރައްޤީގާ އެންމެ އީޖާދީ ވިސްނުން ގެންގުޅޭ ރަށް" މި ކެޓަގަރީގައި ފުވައްމުލަކުންވެސް ދަނީ ވާދަކުރަމުންނެވެ. އަދި ފުރަތަމަ ބުރު ނިމުނުއިރު މިކެޓަގަރީގެ ގަދަ ފަސް ރަށުގެ ތެރޭގައި ފުވައްމުލައް ވަނި ހިމެނިފައެވެ. އެވޯޑު ކާމިޔާބުކުރާނީ އެންމެމަތިން މާކްސްލިބޭ ރަށެކެވެ. މާކުސް ދިނުމުގައި ރަށްރަށަށްގޮސް ޖަޖުކުރުމަށްފަހު ފަނޑިޔާރުން މިހާރުވަނީ މާކުސްދީ ނިންމާފައެވެ. އެއީ މުޅި މާކުސްގެ 60 އިންސައްތައެވެ. ބާކީ 40 އިންސައްތަ ނިންމާނީ އާންމުންގެ ވޯޓުންނެވެ. މި އެވޯޑަށް ވޯޓުލެވޭނީ ޕީއެސްއެމް އެއަރ މޮބައިލް އެޕްލިކޭޝަން މެދުވެރިކޮށެވެ. ވޯޓުލުމަށް ހުޅުވާލާފައިވަނީ، މިހިނގާ ނޮވެންބަރުމަހުގެ 15ވާ އާދިއްތަ ދުވަހާ ހަމައަށެވެ.

ޗާލު ދިވެހިރާއްޖެ އެވޯޑަކީ، ރާއްޖޭގެ ރަށްރަށުގެ ރައްޔިތުންގެ އިސްނެގުމާއެކު، ރާއްޖޭގެ ތިމާވެށި ހިމާޔަތްކޮށް ރައްކާތެރިކުރުމަށް ކުރާ މަސައްކަތްތަކާއި، ދިވެހީންގެ މުއްސަނދި އާދަކާދައާއި ސަޤާފަތް ކުރިއެރުވުމަށް ރަށްރަށުން ކުރާ މަސައްކަތްތައް ދެނެގަނެ، އެ މަސައްކަތުގެ އަގު ވަޒަންކުރުމުގެ ގޮތުން ދެވޭ އެވޯޑެކެވެ.

ފުވައްމުލައް ސިޓީ ކައުންސިލަކީ ތަރައްޤީގައި އީޖާދީ ވިސްނުން އަބަދުވެސް އިސްކުރާ ދެމެހެއްޓެނިވި ރައްޔިތުންނަށް މަންފާ ކުރާ ތަރައްގީގެ ވިސްނުން ގެންގުޅޭކައުންސިލެއްކަން ކަމާބެހޭ ހުރިހާ އިދާރާތަކުން އަބަދުވެސް ފާހަގަކުރެއެވެ. ރާއްޖޭގެ ހުރިހާ ކައުންސިލްތަކަށް ބަލާއިރުވެސް އެންމެ ކުރީ ސަފުގައި ގުނާލެވޭ އެއް ކައުންސިލެވެ. ތަރައްގީގެ މަގުގައި ފުވައްމުލަކުން ހޯދަމުންދާ ކުރިއެރުމަކި މިކަމުގެ އެންމެ ބޮޑު ހެކިކަމަށް ދެންނެވިދާނެއެވެ.