ނަފްސާނީ ދުޅަހެޔޮކަމުގެ ހަފުތާއާ ގުޅުވައިގެން ފުވައްމުލަކުގައި ޚާއްޞަ ސެޝަންތަކެއް ކުރިއަށް ގެންގޮސްފި

މިއަހަރުގެ ނަފްސާނީ ދުޅަހެޔޮކަމުގެ ހޭލުންތެރިކަން އިތުރުކުރުމުގެ ހަފުތާއާ (މެންޓަލް ހެލްތު އެވެއަރނަސް ވީކް) ގުޅުވައިގެން، ފުވައްމުލައް ސިޓީގެ ސްކޫލްތަކުގެ ދަރިވަރުންނަށާއި ބެލެނިވެރިންނަށް އަމާޒުކޮށްގެން ހޭލުންތެރިކުރުމުގެ ޚާއްޞަ ސެޝަންތަކެއް ކާމިޔާބުކަމާއެކު ކުރިއަށް ގެންގޮސްފިއެވެ.

ޒިކުރާ އިންޓަރނޭޝަނަލް ކޮލެޖުން އިސްނަގައިގެން ކުރިއަށް ގެންދިޔަ މި ޕްރޮގްރާމް ކުރިއަށް ގޮސްފައިވަނީ މިމަހުގެ 1 އިން ފެށިގެން 5 ވަނަ ދުވަހުގެ ނިޔަލަށެވެ.

މި ސެޝަންތަކުގައި ފުވައްމުލަކު ސްކޫލް، ޙާފިޘު އަޙްމަދު ސްކޫލް އަދި ޏ. އަތޮޅު ތަޢުލީމީ މަރުކަޒުގެ ގްރޭޑް 7، 8 އަދި 9 ގައި ތަޢުލީމު ޙާޞިލުކުރަމުންދާ ޖުމްލަ 137 ދަރިވަރަކު ވަނީ ބައިވެރިވެފައެވެ. ދަރިވަރުންނަށް ޚާއްޞަކޮށްގެން ކުރިއަށް ގެންދިޔަ ސެޝަންތަކުގައި މައިގަނޑު ގޮތެއްގައި އަލިއަޅުވާލާފައިވަނީ ކިޔެވުމުގައި ވަގުތު މެނޭޖުކުރާނެ ގޮތްތަކާއި، އަމިއްލަ ނަފްސަށް އޮންނަ އިތުބާރު (އެކަޑެމިކް ސެލްފް-ކޮންފިޑެންސް) އިތުރުކުރާނެ ގޮތްތަކުގެ މައްޗަށެވެ.

ދަރިވަރުންގެ އިތުރުން، މި ޕްރޮގްރާމުގެ ދަށުން ބެލެނިވެރިންނަށް ޚާއްޞަކޮށްގެންވެސް ސެޝަންތަކެއް ވަނީ ބާއްވާފައެވެ. މި ސެޝަންތަކުގައި ދަރިވަރުން ތަޙައްމަލުކުރާ އެންޒައިޓީއާއި ސްޓްރެސް ދެނެގަނެ، އެކަންކަން މެނޭޖުކުރުމަށްޓަކައި ގޭތެރޭގެ މާޙައުލުގައި ބެލެނިވެރިންނަށް އެހީތެރިވެދެވިދާނެ މުހިންމު ގޮތްތައް ވަނީ ދަސްކޮށްދީފައެވެ. ބެލެނިވެރިންގެ ސެޝަންތަކުގައި ޙާފިޘު އަޙްމަދު ސްކޫލް، ޏ. އަތޮޅު ތަޢުލީމީ މަރުކަޒު، ޒިކުރާ ސްކޫލް، ބްރައިޓްވޭ އިންޓަރނޭޝަނަލް ފުވައްމުލައް ސްކޫލުން ޖުމްލަ 40 ބެލެނިވެރިން ބައިވެރިވިއެވެ.

މި ސެޝަންތައް ނަންގަވައިދެއްވީ ޒިކުރާ އިންޓަރނޭޝަނަލް ކޮލެޖުގެ ފެކަލްޓީ އޮފް ހެލްތު ސައިންސަސްގެ ޑީން އަލްފާޟިލާ ޢާއިޝަތު ޛޫޝާން ޙުސައިން ޒަރީރެވެ.

މިފަދަ ޕްރޮގްރާމްތަކަކީ ދަރިވަރުންގެ ނަފްސާނީ ދުޅަހެޔޮކަން ރަނގަޅުކޮށް، ތަޢުލީމީ މައިދާނުގައި ކާމިޔާބު ކުދިންތަކަކަށް ހެދުމަށާއި، ބެލެނިވެރިން މިފަދަ މުހިންމު ކަންކަމަށް ހޭލުންތެރިކުރުވުމަށް ނުހަނު ބޭނުންތެރި ޕްރޮގްރާމްތަކެއް ކަމަށް ޒިކުރާ އިންޓަރނޭޝަނަލް ކޮލެޖުން މަޢުލޫމާތުދެއެވެ.