އެމްޑަބްލިއުއެސްސީގެ އެމްޑީ ބައިވެރިވެވަޑައިގެންނެވި ޚާއްޞަ "ޑޯޓުޑޯ" ހަރަކާތެއް ފުވައްމުލަކުގައި ބާއްވައިފި

މާލޭ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އިން ދެމުންދާ ޚިދުމަތްތަކާ ގުޅޭގޮތުން ފުވައްމުލަކު ކަސްޓަމަރުންނަށް މަޢުލޫމާތު ދިނުމަށްޓަކައި، އެ ކުންފުނީގެ މެނޭޖިންގ ޑިރެކްޓަރާއި ސީނިއަރ މެނޭޖްމަންޓް ބައިވެރިވެވަޑައިގެންނެވި ޚާއްޞަ "ޑޯޓުޑޯ" (ގޭގެއަށް ޒިޔާރަތްކުރުމުގެ) ހަރަކާތެއް މިއަދު ކުރިއަށް ގެންގޮސްފިއެވެ.

އެ ކުންފުނިން މައުލޫމާތުދޭ ގޮތުގައި މި ކެމްޕޭނުގެ މައިގަނޑު މަޤްޞަދަކީ އެމް.ޑަބްލިޔު.އެސް.ސީގެ ޚިދުމަތް ހޯދަމުންދާ އެންމެހާ ކަސްޓަމަރުން ކުންފުނީގެ ދަފްތަރުގައި ރަސްމީކޮށް ރަޖިސްޓްރީކުރުމާއި، ކަސްޓަމަރުންގެ  އެންމެ ފަހުގެ މަޢުލޫމާތަށް އަދާހަމަކުރުމަށް ބާރުއެޅުމެވެ.

މިއަދު ހެނދުނު ފުވައްމުލަކުގެ އެކި ސަރަހައްދުތަކުގައި ކުރިއަށްދިޔަ މި ހަރަކާތުގައި، އެމްޑަބްލިއުއެސްސީގެ ކަސްޓަމަރުންގެ ލިސްޓަށް އަލަށް އިތުރުވި ގޭބިސީތަކަށް، ކުންފުނިން ފޯރުކޮށްދޭ ޚިދުމަތްތަކުގެ މަޢުލޫމާތު ދިނުން އޮތެވެ. މީގެ އިތުރުން، ކަސްޓަމަރުންގެ މަޢުލޫމާތު އަދާހަމަކުރުމާއި، ޚިދުމަތްތައް އިތުރަށް ފުރިހަމަކުރުމަށްޓަކައި ރައްޔިތުންގެ ޚިޔާލާއި ކަންބޮޑުވުންތައް ހޯދާފައިވެއެވެ.

ޒަމާނީ ވަސީލަތްތައް ބޭނުންކޮށްގެން ފަސޭހަކަމާއެކު ޚިދުމަތް ލިބިގަނެވޭނެ އިންތިޒާމު ހަމަޖެއްސުމުގެ ގޮތުން، އެމްޑަބްލިއުއެސްސީގެ މޯބައިލް އެޕްލިކޭޝަން ބޭނުންކުރާނެ ގޮތުގެ މަޢުލޫމާތުވެސް މި ހަރަކާތުގެ ތެރެއިން ވަނީ ފޯރުކޮށްދީފައެވެ. އަދި މަޢުލޫމާތު އަދާހަމަކުރުމުގެ ކަންކަން ފަސޭހަކުރުމުގެ ގޮތުން، އޮންލައިން ފޯމެއް މެދުވެރިކޮށް މަޢުލޫމާތު ހުށަހެޅޭނެ އިންތިޒާމުވެސް ކުންފުނިން ވަނީ ހަމަޖައްސައިފައެވެ.

ފުވައްމުލަކުގައި އަލަށް ފެނާއި ނަރުދަމާގެ ޚިދުމަތް ދޭން ފެށި އެމްޑަބްލިއުއެސްސީން ވަނީ ކުރު މުއްދަތެއްގެ ތެރޭގައި ރައްޔިތުންނާ ގާތުން މަސައްކަތްކޮށް، ދިމާވާ މައްސަލަތަކަށް އަވަސް ހައްލުތަކެއް ހޯދައިދޭ ކުންފުންޏެއްގެ ގޮތުގައި ފާހަގަކުރެވިފައެވެ.