ފުވައްމުލަކުގައި ވީޑިއޯ އެސިސްޓެންޓަކާއެކީ ބޭއްވޭ ފުރަތަމަ ފުޓްސަލް މުބާރާތް ވެސްޓްރޭޑް ބޮޑުބެ ޗެލެންޖް ފެށިގެން ކުރިޔަށް ދަނީ

ބޮޑުބެ ޑޮޓްކޮމްގެ ފައުންޑަރ އަހުމަދު ސައީދުގެ އިސްނެންގެވުމުގެ މަތިން ރަށި އިވެންޓްސް އާއި ގުޅިގެން ކުރިޔަށްގެންދާ ވެސްޓްރޭޑް ބޮޑުބެ ޗެލެންޖް 2026 ،17 އޯގަސްޓް 2026 ވީ ހޯމަދުވަހު ފެށިގެން ކުރިޔަށް އެބަދެއެވެ. މި މުބާރާތުގެ މެޗުތައް ކުޅެވެމެންދަނީ ފުވައްމުލަކު މާދަޑު ފުޓްސަލް ދަނޑުގައެވެ. ކޮންމެ ރެއަކު ތިންމެޗް ކުޅެވޭ އިރު ފުރަތަމަ މެޗު 20:15 ގައި ދެވަނަމެޗު 21:15 ގައި އަދި ތިންވަނަމެޗު ކުޅެވެނީ 22:15 ގައެވެ.

މުބާރާތުގެ އޯގަނައިޒިންޓީމުގެ ޗެއާ ހަސަން މުތީއު މާއިރިއަށް މައުލޫމާތު ދެމުން ވިދާޅުވީ މިފަދަ މުބާރާތެއް ފުވައްމުލަކުގައި ރާވާ ހިންގުމުގެ މަގްސަދަކީ ފުވައްމުލައްސިޓީގެ ރައްޔިތުންގެ މެދުގައި އިޖްތިމާއީ ރޫހު ވަރުގަދަކޮށް ފުޓްސަލް ކުރިއެރުވުމެވުމާއި ފުވައްމުލަކަށް ނިސްބަތްވާ ވިޔަފާރިތަކަށާއި އެހެނިހެން ވިޔަފާރިތަކަށް އެބޭފުޅުންގެ ވިޔަފާރި އިޝްތިހާރު ކުރުމަށް ފަހި ފުރުސަތުތަކެއް ހޯދައި ދިނުމުގެ އިތުރުން އަންހެނުން ބާރުވެރި ކުރުވުމާއި ޚާއްސަ ކުޅެދުންތެރިކަން ހުންނަ ފަރާތްތަކާއި ޖުމްލަކޮށް އެންމެހައި ފަރާތްތައް ގުޅިގެން ކަންކަން ރާވާ ހިންގަން ފަހި ފުރުސަތުތަކެއް ހޯދައިދިނުން ކަމުގައިވެސް ހަސަން ވިދާޅުވިއެވެ. މީގެއިތުރުން އަބަދުވެސް ފުވައްމުލަކަށް ފުޓްސަލްގެ ތެރެއިން އާކަންތައްތަކެއް ތައާރަފުކުރުން އެއީވެސް ވަރަށް އިސްކަންދޭ ކަމެއްގެ ގޮތުގައި ހަސަން ފާހަނގަ ކުރެއްވިއެވެ. އެގޮތުން ވީޑިއޯ އެސިސްޓެންޓަކާއެކީ ފުވައްމުލަކުގައި ބޭއްވޭ އެންމެ ފުރަތަމަ ފުޓްސަލް މުބާރާތަކީ މި މުބާރާތްކަމަށާއި އެހެންކަމުން މި މުބާރާތުގެ ތެރެއިން ފުވައްމުލަކަށް މިކަން ތައާރަފްވެގެން ދިޔައީކަންވެސް އޭނާ ފާހަނގަކުރެއްވިއެވެ.

މުބާރާތުގެ މިއަހަރުގެ އެޑިޝަންގައި ފުވައްމުލަކަށް ނިސްބަތްވާ ޖުމްލަ 8 ޓީމު ބައިވެރިވެފައިވާ އިރު މުބާރާތް ކުޅެނީ ދެ ގްރޫޕަކަށް ބަހާލެވިގެން ކޮންމެ ގްރޫޕަކުންވެސް އެންމެގިނަ ޕޮއިންޓު ހޯދާ ދެ ޓީމް ކްރޮސްކޮށް ސެމީފައިނަލް ކުޅޭގޮތަށެވެ. ގްރޫޕް އޭ ގައި ހިމެނޭ ޓީމުތަކަކީ ހޯދަޑު އެކަޑަމީ، ދަށިކިޅި ކްލަބް، އައްޔަނި އެސް. ސީ އަދި ހޯދަޑު ސްޕޯޓްސް ކުލަބެވެ. ގްރޫޕް ބީ ގައި ހިމެނެނީ ގަލޯނާ ސްޕޯޓްސް ކްލަބް، ޑީ.އެސް.އާރު.ސީ ޖޫނިއާރސް، ޔުނައިޓެޑް ދިގުވާނޑު ސްޓްރައިކާސް، އަދި ޔުނައިޓެޑް ދިގުވާނޑު އެވެ.

 24 އޯގަސްޓް 2026 ވާ ހޯމަދުވަހުގެ ރޭ ފައިނަލް ކުޅުމަށް ހަމަޖެހިފައިވާ މި މުބާރާތުގެ ޗެމްޕިއަންޓީމަށް ފަންސާސް ހާސް އަދި ރަނަރ އަޕްޓީމަށް ފަންސަވީސް ހާސް ރުފިޔާގެ އިނާމެއް ލިބިގެންދާނެއެވެ.