ގައުމީދުވަހުގެ ރަސްމީ ދިދަނެގުން މާދަމާ ހެނދުނު އޮންނާނެ

ގައުމީ ދުވަހުގެ ރަސްމީ ދިދަނެގުން މާދަމާ ހެނދުނު ފުވައްމުކު އަތޮޅު ކައުންސިލް އިދާރާގައި އޮންނާނޭކަމަށް އެއިދާރާއިން މައުލޫމާތު ދެއްވައިފިއެވެ.

އަތޮޅު ކައުންސިލް އިދާރައިން މައުލޫމާތު ދެއްވި ގޮތުގައި ދިދަނެގުމުގެ ރަސްމިއްޔާތު ފެށޭނީ މާދަމާ (24 ޖެނުއަރީ 2012 ) ހެނދުނު 5:45 ގައެވެ. މިރަސްމިއްޔާތުގައި ފުވައްމުލަކު އަތޮޅުކައުންސިލާއި ރަށުކައުންސިލްތައް އަދި ފުވައްމުލަކުގައި ހުރި އެހެނިހެން ސަރުކާރުގެ އިދާރާތަކަށް ދައުވަތު ދެވިފައިވާކަމަށްވެސް އެއިދާރާއިން މައުލޫމާތު ދެއްވައެވެ. އަދި މިރަސްމިއްޔާތުގައި ވީހާ ގިނަ ބަޔަކު ބައިވެރިވުމަކީ އަތޮޅު ކައުންސިލްގެ ވަރަށް ބޮޑު އެދުމެއްކަމުގައިވެސް އެއިދާރާއިން މައުލޫމާތު ދެއްވައެވެ.

ފުވައްމުލަކުގައި ގައުމީ ދުވަސް ފާހަގަކުރުމުގެ ގޮތުން މާދަމާ ހަވީރު ވެހިކަލް ބުރެއް ބާއްވާ ގޮތަށްވެސް ވަނީ ހަމަ ޖެހިފައެވެ. މިއަހަރުގެ ގައުމީ ދުވަސް ފުވައްމުލަކުގައި ކުލަގަދަކޮށް ފާހަގަ ކުރުމުގެ ކަންތައް ކުރިއަށްގެންދަވަނީ ފުވައްމުލަކު އުތުރު ދާއިރާއިންނެވެ.

އުތުރު ދާއިރާއިން މިކަމުގައި އިސްކޮށް އުޅުއްވާ އެއްބޭފުޅެއްކަމަށްވާ ފުވައްމުލަކު ހޯދަޑު ކައުންސިލްގެ ރައީސް މުހައްމަދު އިބްރާހިމް ކައްޓެޅިއަށް މައުލޫމާތު ދެއްވަމުން ވިދާޅުވީ ގައުމީ ދުވަސް ކުލަގަދަކޮށް ފާހަގަކުރުމުގެ ގޮތުން ތަފާތު ހަރަކާތްތަކެއް ރޭވިވައިވާކަމުގައެވެ. އެގޮތުން މާދަމާ ހެނދުނު އޮންނަ ދިދަ ނެގުމުގެ ރަސްމިއްޔަތުގެ އިތުރުން މާދަމާ ހަވީރު ވެހިކަން ބުރަކާއި މިމަހު 27 ވަނަ ދުވަހު ހަވީރު ޚާއްސަ ކްރިކެޓް މެޗެއް އަދި ހަމަ އެރޭ ބަޑިބޭހުގެ ކުޅިވަރުތަކެއް އޮންނާނޭކަމަށްވެސް ވިދާޅުވިއެވެ. ކްރިކެޓް މެޗު ބޭއްވުމަށް ހަމަޖެހިފައިވަނީ އަހުމަދު އަލިދީދީ ކްރިކެޓް ގްރައުންޑުގައެވެ. އަދި ބަޑިބޭހުގެ ކުޅިވަރުތައް ބޭއްވުމަށް ހަމަޖެހިފައިވަނީ ފުވައްމުލަކު ސްޓޭޑިއަމްގައެވެ.