ސިޓީ ހޮޓާ

މަޝްރޫއު އިއުލާނުކުރިތާ އެތައް އަހަރެއް ވެގެންދިޔައިރުވެސް އަމަލީ މަސައްތް ފެށިފައިނުވާ ފުވައްމުލަކު ސިޓީ ހޮޓަލުގެ މަސައްކަތް މިއަހަރުގެ ތެރޭގައި ފެށޭނެކަމުގެ އުއްމީދު ވަރަށް ބޮޑުކަމަށް ސިޓީ ހޮޓަލުގެ ބިޑް ކާމިޔާބުކޮށްފައިވާ ވަން އެންޑް ހާފް ޑިގްރީ މޯލްޑިވްސްގެ ހިއްސާދާރެއް ވިދާޅުވެއްޖެ އެވެ.

މިވަގުތު ނަން ހާމަކުރައްވަން ބޭނުންފުޅުނުވާ މައްސޫލުވެރިޔާ ކައްޓެޅިއަށް މައުލޫމާތު ދެއްވަމުން ވިދާޅުވީ 200 އެނދުގެ ސިޓީ ހޮޓަލެއް ފުވައްމުލަކުގައި ތަރައްގީ ކުރުމަށް 2006 ވަނަ އަހަރު ސަރުކާރުން އެކުންފުންޏާ ހަވާލުކުރި ސަރަހައްދުގައި އަލުން މަސައްކަތް ފެށުމަށް މިހާރު އައްނަނީ ތައްޔާރުވަމުނެވެ. އަދި މިއަހަރުތެރޭ މަސައްކަތް ފެށޭނެކަމުގެ އުއްމީދު ވަރަށް ބޮޑު ކަމަށާއި މިކަމަށް ބޭނުންވާ ފައިސާގެ ކަންތައްވެސް މިހާރު ހަމަޖެހިފައިވާކަމަށް އޭނާ ވިދާޅުވިއެވެ.

"ހޮޓަލުގެ މަސައްކަތް ކުރުވާނީ ފުވައްމުލަކުގެ އެކި ގްރޫޕުތަކާ ހަވާލުކޮށްގެން، މަސައްކަތް ފެށުނީމަ މަސައްކަތް ނިންމަން ނަގާނީ އަށް މަސްދުވަސް" ކައްޓެޅިއަށް މައުލޫމާތު ދެއްވި އޮފިޝަލް ވިދާޅުވިއެވެ.

ސިޓީ ހޮޓާ ހެދުމަށް ވަން އެންޑް ހާފް ޑިގްރީ މޯލްޑިވްސްއަށް ފުވައްމުލަކުން ދީފައިވާ ސަރަހައްދަކީ ފަޅު ރަށެއްގެ ގޮތުގައި ރައީސުލްޖުމްހޫރިއޔާ މުޙައްމަދު ނަޝީދު މިމަހުގެ ތިންވަނަ ދުވަހު ވަނީ ހަމަޖައްސަވައިފައެވެ. މިކަމުގެ ސަބަބުން މަސައްކަތަށް އިތުރު ހަލުވިކަމެއް އައްނާނެކަމަށާއި ނަމަވެސް ހޮޓަލުގައި ރާވިއްކުމުގެ ވިސްނުން ނުގެންގުޅުއްވާކަމަށްވެސް މައުލޫމާތު ދެއްވި ފަރާތުން ވިދާޅުވިއެވެ. ފުވައްމުލަކު އެއާޕޯޓުގެ މަސައްކަތް ނިމުމަކަށްދާތީ މިއީވެސް ހޮޓަލުގެ މަސައްކަތަށް ލިބުނު އިތުރު ބާރެއްކަން އޭނާ ފާހަގަ ކުރެއްވިއެވެ.

ފުވައްމުލަކުގައި 200 އެނދުގެ ސިޓީ ހޮޓަލެއް ތަރައްގީކުރުމަށް ވަން އެންޑް ހާފް ޑިގްރީ މޯލްޑިވްސްއަށް އޭރުގެ ސަރުކާރުން ދިނީ 2006 ވަނަ އަހަރުގެ ތެރޭގައެވެ. އެގްރިމަންޓްގައިވާގޮތުން 18 މަސްދުވަހުގެ ތެރޭގައި ހޮޓާ ހުޅުވަންޖެހެއެވެ. ނަމަވެސް މުއްދަތު ފަހަނައަޅާ ދިޔައިރުވެސް ހޮޓާ އެޅުމަށް އެކަށީގެންވާ މަސައްކަތެއް ކޮށްފައިނުވާތީ އޭރުގެ ސަރުކާރުން ވަނީ 2008 ވަނަ އަހަރު އެ އެގްރީމެންޓް ބާތިލްކޮށްފައެވެ. އެގްރިމަންޓް ބާތިލް ކުރިއިރު ހޮޓާ އެޅުމަށް ހަމަޖެހިފައިވާ ސަރަހައްދު ވަށައިގެން ފެންސް ޖެހުން ފިޔަވައި އިތުރު މަސައްކަތެއް އެ ސަރަހައްދުގައި ވަން އެން ހާފް ޑިގްރީ މޯލްޑިވްސް އިން ކޮށްފައެއް ނުވެއެވެ.

ފުވައްމުލަކުގައި 200 އެނދުގެ ހޮޓަލެއް ތަރައްގީކުރުމަށް ވަން އެންޑް ހާފް ޑިގްރީ މޯލްޑްވްސްއާ ސަރުކާރާދެމެދު 2006 ވަނަ ކޮށްފައިވާ އެގްރިމަންޓް 2008 ވަނަ އަހަރު އުވާލާފައިވީނަމަވެސް، މިހާރުގެ ސަރުކާރުން މި މައްސަލަ ދިރާސާކުރެއްވުމަށްފަހު ފުވައްމުލަކު ސިޓީ ހޮޓަލުގެ މަޝްރޫއު އަލުން ބިޑުކުރުމެއްނެތި ވަން އެންޑް ހާފް ޑިގްރީ އަށް ސަރުކާރުން ދެއްވާފައިވާކަމަށް ވަން އެންޑް ހާފް ޑިގްރީގެ އޮފިޝަލް ކައްޓެޅިއަށް ޔަގީންކޮށްދެއްވި އެވެ.

އެގްރީމެންޓްގައިވާ ގޮތަށް އަލުން މަސައްކަތް ކުރިޔަށް ގެންދިއުމަށް މިހާރުގެ ސަރުކާރުން ނިންމާފައިވާކަމަށް 2009 ވަނަ އަހަރުގެ ފަހުކޮޅު ކައްޓެޅިއަށް ދެއްވި އިންޓަވިއުއެއްގައި އަތޮޅު ކައުންސިލްގެ ރައީސް ހަސަން ސައީދުވެސް ވިދާޅުވެފައި ވެއެވެ. ހަސަން ސައީދު މިއަދު ވިދާޅުވީ ސިޓީ ހޮޓާ ހެދުމަށް ހަމަޖެހިފައިވާ ބިމުގައި އެއްވެސް މަސައްކަތެއް ނުކުރެވި ގިނަ ދުވަސްތަކެއް ފާއިތުވެގެންދާތީ ބިމުގެ ކަންތައް ކޮންމެވެސް ގޮތަކަށް ނިއްމަވައިދެއްވުމަށް ޓޫރިޒަމް މިނިސްޓްރީގައި މިހާރު އެދިފައިވާނެކަމަށެވެ. އަދި ކައުންސިލާ ބިން ހަވާލުކުރިނަމަވެސް އެ ސަރަހައްދު ޚާއްޞަކުރާނީ ފަތުރުވެރިކަމުގެ މަސައްކަތަށްކަމުގައި އޭނާ ވިދާޅުވިއެވެ.