މާދަޑު ކައުންސިލުން ކުޑަކުދިންގެ ޕާކެއް ހަދަނީ

ފުވައްމުލަކު ޒުވާނުންނާއި ކުޅިވަރުމަރުކަޒާއި އިންވެގެން ފުވައްމުލަކު ޕޮލިސް ސްޓޭޝަންގެ ފުރަގަހުގައި ކުޑަކުދިންގެ ޕާކަކަށް ޚާއްޞަކޮށްފައިވާ ބިން ކުޑަކުދިންގެ ޕާކެއްގެގޮތުގައި ތަރައްގީ ކުރުމުގެ މަސައްކަތް މާދަޑު ކައުންސިލުން ފަށައިފިއެވެ.

މާދަޑު ކައުންސިލުން އިތުރަށް ތަރައްގީ ކުރުމުގެ މަސައްކަތް ކުރިޔަށް ގެންދާ ކުޑަކުދިންގެ ޕާކަކީ މީގެ އަހަރުތަކެއް ކުރިން ކުޑަކުދިންގެ ޕާކެއްގެގޮތުގައި ތަރައްގީކޮށް ކޮންމެވެސްވަރަކަށް ބޭނުންކުރެވުނު ތަނެކެވެ. ނަމަވެސް އަޅައިނުލާ ދޫކޮށްލުމުގެ ސަބަބުން އެތަން މިހާރުވަނީ ވަރަށް ބޮޑަށް ވީރާނާވެފައެވެ.

ކައްޓެޅިއަށް މައުލޫމާތު ދެއްވަމުން މާދަޑު ކައުންސިލްގެ ނައިބު ރައީސް މުހައްމަދު ޔާމީން ވިދާޅުވީ ކައުންސިލުން މިވަގުތަށް ރާވާފައިވަނީ އެތަނުގައި ކުރިންވެސް ހުރި ތަކެތި މަރާމާތުކޮށް އާބާތުރަ ފިލުވުމަށާއި ހަތަރު ތަނުން ސްލައިޑް ކުރެވޭ ދެ ޕްލެޓްފޯމުގެ ސްލައިޑް ސިސްޓަމެއް ބެހެއްޓުމަށް ކަމުގައެވެ. އޭނާ އިތުރަށް ވިދާޅުވީ ހެޔޮއެދޭފަރާތެއްގެ ދީލަތި އެހީގައި ލިބިފައިހުރި ސްލައިޑް ސިސްޓަމް ބަހައްޓާ ދެޕްލެޓްފޯމު ހުންނާނީ ބްރިޖަކުން ގުޅާލެވި މަތި ހިޔާކުރެވިފައިކަމުގައެވެ.

އިތުރަށް މައުލޫމާތު ދެއްވަމުން ޔާމީން ވިދާޅުވީ މިކަމަށް ގާތްގަނޑަކަށް 20 ހާސްރުފިޔާވަރު ޚަރަދު ވާނޭކަމަށް ލަފާކުރައްވާކަމުގައެވެ. މިމަސައްކަތް ކުރިއަށް ގެންދިޔުމުގައި ފުވައްމުލަކު ރޯވާސްކައުޓުންގެ ވަރަށްބޮޑު އެހީތެރިކަމެއް ލިބެމުންދާކަމަށާއި އެމީހުންގެ އެހީތެރިކަމާއެކު އެސަރަހައްދުގެ އިންމަތީގައި ދުގެތި ޖެހުމަށް ޚިޔާލުކުރެވިފައިވާކަމަށްވެސް އޭނާ ވިދާޅުވިއެވެ.

އޭނާ ވިދާޅުވީ މިއީ ފެށުމެއްކަމަށާއި އިތުރު ތަރައްގީތައް އެތަނަށް ގެނައުމަށް ކައުންސިލުން ވިސްނައި އެކަމަށް މަސައްކަތްވެސް ކުރެވެމުންދާކަމުގައެވެ. އަދި މިހާތަނަށް ކުރެވިފައިވާ މަސައްކަތަށް ވަރަށް ބޮޑު ކުރިއެރުންތައް ލިބިފައިވާކަމަށްވެސް އޭނާ ވިދާޅުވިއެވެ.

މިފަދަކަންކަމަކީ ހުރިހާ ރައްޔިތުންގެ ލާބަޔާއި މަންފާއަށް ކުރެވޭ ކަންކަންކަމަށާއި ތަނުގެ ބޭނުން އެންމެ ފުރިހަމަ ގޮތުގައި ފަރުވާތެރިކަމާއެކު ހިފުމަކީ ކައުންސިލްގެ ވަރަށް ބޮޑު އެދުމެއްކަމަށާއި މިތަނުގެ ބޭނުން އެދެވޭ ގޮތުގައި ރައްޔިތުން ހިފުމަކީ ތަން ތަރައްގީ ކުރުމަށް ކައުންސިލަށް ލިބިގެންދާނޭ ވަރަށްބޮޑު ހިތްވަރެއްކަމުގައިވެސް ޔާމީން ވިދާޅުވިއެވެ.