މިޚިޔާލު؟

ދިވެހިރާއްޖޭގެ ޤުދުރަތީ ރީތިކަމުގެ ވާހަކަ ދައްކަނީ، ހަމައެކަނި ދިވެހިންނެއްނޫނެވެ. މިހިތްގައިމު މާޙައުލު ދެކިލަން ބޭނުންވަނީވެސް، ހަމައެކަނި ދިވެހިންނެއްނޫނެވެ. މިފަދަ ދެވަނަ މިސާލެއް ދުނިޔެއިން ނުފެންނާނެފަދަ ޗާލު މިވެށީގެ ހިތްގައިމު މަންޒަރުތަކުން، ހިތްތަކަށް އަރާމާ އުފާ ޙާޞިލްކުރަމުން ގެންދަނީވެސް، ހަމައެކަނި ދިވެހިންނެއް ނޫނެވެ.

ފަތުރުވެރިކަމަކީ ދިވެހިންގެ އިޤްތިޞާދުގެ މައިނާރުކަންއެގި، ފަތުރުވެރިކަމުގެ ތަފާތު ވަތްތަރުތައް މިރާއްޖެއަށް ތަޢާރަފްވެ، ފަތުރުވެރިކަމުގެ ޢަމަލީ ޙަރަކާތްތައް ރާއްޖޭގެ ކަންކޮޅުތައް ފެތުރި، އެމަސައްކަތުން ހޯދެންއޮތް ހުރިހާ ލާބަޔަކާ ތަނަވަސްކަމެއް، ދިވެހިން މިގެންދަނީ ހޯދަމުންނެވެ. އެއީ އުފާކުރަންޖެހޭ ކަމެކެވެ. ހިތްހަމަޖެހޭ ކަމެކެވެ. ފަތުރުވެރިކަމުގެ މަސައްކަތުގައި ޝާމިލްވާންވީ ހުރިހާ ދިވެހިންނެވެ. މިރާއްޖޭގެ ޤުދުރަތީ ވެށީގެ ފައިދާ ޙާޞިލްކުރަންޖެހޭނީ މިޤައުމުގެ ދަރިންނެވެ. މިޤައުމުގެ ރައްޔިތުންނެވެ. އެއީ ލިބިގަންނަންޖެހޭ ޙައްޤެކެވެ.

ފުވައްމުލަކު ބަނދަރަކީ އެބަނދަރު ހުޅުވުނީއްސުރެ، ވަރަށްގިނަބަޔަކު ބޭނުންކުރާ ބަނދަރެކެވެ. ރާއްޖޭގެ އެކިކަންކޮޅުތަކުގެ އުޅަނދުފަހަރު އަބަދުވެސް މިބަނދަރުގެ ބޭނުންކުރެއެވެ. އެހެންކަމާއެކު ބަނދަރުތެރެއާ އަދި އެސަރަޙއްދަކީ، އަބަދުވެސް ވަރަށްގިނަ ޙަރަކާތްތަކެއް ހިނގަމުންދާ ސަރަޙައްދެކެވެ. ރަށުގެ ގިނަބަޔަކު ރޭގަނޑާ ދުވާލު އެސަރަޙައްދަށް ޒިޔާރަތްކޮށް، އެމާޙައުލު ދެކިލުމުގެ އުފާ ލިބިގަންނަ ސަރަޙައްދެކެވެ.

ފުވައްމުލަކު ބަނދަރަކީ ފުވައްމުލަކުގެ ތަރއްޤީއަށް ހުޅުވިގެންދިޔަ ދޮރެކެވެ. ރަށަށްއަރާފޭބުމުގެ ފަސޭހަ އެބަނދަރުގެ ސަބަބުން ލިބިގެންދިއުމުގެ އިތުރުން، ރަށުގެ އިޤްތިޞާދަށްވެސް މިއީ ހުޅުވިގެންދިޔަ ދޮރެކެވެ. އެހެންކަމާއެކު މިބަނދަރުގެ ސަބަބުން މިރަށުގެ އިޤްތިޞާދަށް ލިބެންޖެހޭ އާމްދަނީއެއް ކިރިޔާވެސް ވާނަމަ، އެއެއްޗެއް ހޯދޭނެމަގު ތަނަވަސްކުރުމަކީ، ފުވައްމުލަކު ބަނދަރުގެ ބެލެނިވެރި ފަރާތަކުން ކުރައްވަންޖެހޭނެ ކަމެކެވެ. ފުވައްމުލަކު ރައްޔިތުންގެ ހަރުމުދާގަނޑެއްގެ އެންމެ ފުރިހަމަ ފައިދާ، އެރައްޔިތުންނަށް ހޯދޭނެ ގޮތްގޮތާމެދު ފިކުރުކޮށްކޮށްތިބުމަކީ، އަބަދުވެސް ކުރަންޖެހޭ ކަމެކެވެ.

ފުވައްމުލަކު ބަނދަރު ހުޅުވި ބޭނުންކުރަން ފެށުނީއްސުރެ، ފަތުރުވެރިކަމުގެ ދާއިރާގައި ބޭނުންކުރާ ތަފާތު އުޅަނދުފަހަރު އެބަޔަކު ބޭނުންދުވަހަކަށް ބަނދަރުތެރޭގައި ތިބޭތަން ފެނެއެވެ. ގިނަޢަދަދެއްގެ ފަތުރުވެރިންނާއެކު ދަތުރުކުރާ މިފަދަ އުޅަނދުފަހަރަކީ، ހަމަ ރިސޯޓްތަކެކޭ އެއްފަދައިން ފަތުރުވެރިކަމުގެ ދާއިރާއިން ރަގަޅު އާމްދަނީ އެއް ހޯދާ އުޅަނދުފަހަރެވެ. ފުވައްމުލަކު ބަނދަރުތެރޭގައި އެފަދައުޅަނދުފަހަރު އޮންނައިރު، އެމީހުން އެޚިދުމަތް ލިބިގަންނަނީ ފުވައްމުލަކު ރައްޔިތުންގެ މިލްކިއްޔާތުގެ ތެރެއިންނެވެ. އެދުވަސްވަރު ފަތުރުވެރިންނަށް މާކެޓްކުރެވެނީ ފުވައްމުލަކުގެ ވެއްޓާއި މާޙައުލެވެ. އެހެންކަމަށްވައްޏާ އެދުވަސްވަރު އެއުޅަނދުފަހަރަށް ލިބޭ އާމްދަނީގެ ޙިއްޞާއެއް ފުވައްމުލަކު ރައްޔިތުންނަށް އޮތުމަކީ ރަގަޅުކަމެވެ.

ސުވާލަކީ އެފަދަ އުޅަނދުފަހަރު ފުވައްމުލަކު ބަނދަރުތެރޭގައި ތިބޭ ދުވަސްތަކަށް، މިރަށުގެ ރައްޔިތުންނަށް ކޮންމެވެސް ކުއްޔެއްދޭން ނުޖެހޭނެ ހެއްޔެވެ. ފުވައްމުލަކު ރައްޔިތުންގެ ފަރާތުން އެފަދަ އުޅަނދުފަހަރުވެރިން ލިބިގަތް ގާތްކަމާ، އިޙްތިރާމާ، އެހީތެރިކަމުގެ ބަދަލުގައި ކަނޑައެޅޭ ކޮންމެވެސް މިންވަރެއްގެ ކުއްޔެއް، ކަނޑައެޅިފައިއޮތް ޤަވާޢިދެއް އެކުލަވާލެވި، އެޤަވާޢިދު ޢާއްމުވެފައި އޮތުމަކީ ނުކުރަންވީ ކަމެއްހެއްޔެވެ. މިހާރުވެސް ބޮޑެތި ޚަރަދުތަކާ މުހިންމު މަރާމާތުތަކެއް ބޭނުންވެފައިވާ ފުވައްމުލަކު ބަނދަރުން އާމްދަނީ ހޯދޭނެ ޤަވާޢިދެއް އެކުލަވާނުލައި ތިބުމަކީ، އެންމެ ޒިންމާދާރުގޮތް ހެއްޔެވެ. ނުވަތަ އެފަދަ ޤަވާޢިދެއް ހެދިފައިވާނަމަ އެއަށް ޢަމަލުނުކުރާނަމަ ނުކުރަނީ ކީއްވެގެން ހެއްޔެވެ. މިހިރީ ހައްތާވެސް އުފެދޭ ސުވާލެވެ.