ދިވެހި ރާއްޖޭގެ ރައީސުލްޖުމްހޫރިއްޔާއަކީ ހުރިހާ ދިވެހި ރައްޔިތުންގެ ރައީސުލްޖުމްހޫރިއްޔާ އެވެ.

ދިވެހި ރާއްޖޭގެ ރައީސުލްޖުމްހޫރިއްޔާއަކީ ހުރިހާ ދިވެހި ރައްޔިތުންގެ ރައީސުލްޖުމްހޫރިއްޔާ އެވެ. އެހެންކަމުން ގައުމުގެ ރައީސުލްޖުމްހޫރިއްޔާއަށް އަދާކުރަންޖެހޭ އިހުތިރާމާއި ގަދަރު އަދާކުރެއްވުމަށް ފަސްޖެހިވަޑައިނުގަންނަވާށެވެ.

އެމެރިކާގެ ރައީސް ބަރަކް އޮބާމާ އެމެރިކާގެ ކޮންގްރެސްގައި ތަގުރީރެއް ދެއްވި މަންޒަރު ސީއެންއެން އިން ދުށީމެވެ. އަޅުގަނޑަށް ފެނުނީ އޮބާމާއަށް ކޮންގްރެސްގެ ހުރިހާ މެންބަރުން އިހްތިރާމް އަދާކުރެއްވި މަންޒަރަވެ. އޮބާމާގެ ތަގުރީރު ނިއްމަވައިލެއްވުމުން ހުރިހާ މެންބަރުން އަތްތިލަބަޑި ޖެއްސެވިތަނެވެ. އެތައް ޕާޓީ އެއްގެ މެންބަރުން ތަމްސީލުކުރާ މުޅި ކޮންގްރެސް ތަރުޙީބުގެ އެއްރޫޙެއްގައި އެއް ޖޯޝެއްގައިވާތީ އަޖާބުވި އެވެ. އެ ހެންވެ، އަޅުގަނޑުގެ ރައްޓެއްސެއް ކުރެން އަހައިލެވުނެވެ. ކޮންގްރެސްގައި މިއަދު އިދިކޮޅު މެންބަރަކު ނެތީ ހެއްޔެވެ. ޖަވަބާގައި އަޅުގަނޑުގެ ރަހުމަތްތެރިޔާ ބުންޏެވެ. ކޮންގްރެސްގައި އިދިކޮޅު މެންބަރުން މަދެއް ނޫނެވެ. ކޮންގްރެސްގައި އޮބާމާގެ ޕާޓީއަށް ނިސްބަތްނުވާ މެންބަރުން ގިނަ އަދަދަކަށް އެބަތިއްބެވެ.

އޮޅުން ފިލި، ހަގީގަތަކީ ކޮންގްރެސްގައި ތިއްބެވި އިދިކޮޅު މެންބަރުންވެސް އޮބާމާއަށް އިހުތިރާމް އަދާކުރެއްވީ އޮބާމާއަކީ އެމެރިކާގެ ރައީސުލްޖުމްހޫރިއްޔާކަމަށްވާތީ އެވެ. އެމަނިކުފާނު ރައީސްކަމަށް ވަޑައިގެންނެވީ އިންތިޚާބެއަގައި ވާދަކުރައްވައިގެން، ޑިމޮކްރެޓިކް ހަމަތަކުގެ މަތިން ކަމަށް ވާތީއެވެ. އެމަނިކުފާނަށް ލިބިގެންވަނީ މުޅި އެމެރިކާގެ ހުރިހައި ރައްޔިތުންގެ ރައީސެއްގެ ހައިސިއްޔަތުކަމަށް ވާތީއެވެ.

ދިވެހި ރާއްޖެ އަކީ ފައްކާވެފައިވާ މި ފަދަ ޒަމާނީ ޑިމޮކްރަސީ އެއްގެ ބޯކޮޅު ބަލަމުން ހިނގާ ގައުމެކެވެ. ދިވެހިރައްޔިތުންނަކީ ޑިމޮކްރަސީއަށް ލޯބި ކުރާ ބައެކެވެ. 2008ވަނަ އަހަރުގެ ރިޔާސީ އިންތިޚާބުގެ ނަތީޖާ މި ކަން ކަށަވަރު ކޮށްދެ އެވެ. ނަމަވެސް ދިވެހިންގެ ތެރޭގައި ޑިމޮކްރަސީ އޮތް ގޮތަކާ މެދު ސުވާލު އުފެދެ އެވެ. ކުޑަ ކުޑަ މިސާލެކެވެ. ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާ މުޙައްމަދު ނަޝީދު މިމަހުގެ ތިންވަނަ ދުވަހު ފުވައްމުލަކަށް ދަތުރުފުޅެއް ކުރެއްވި އެވެ. އެ ދަތުރުފުޅުގައި އަޅުގަނޑަށް ފެނުނު ބައެއް މަންޒަރުތަކުން، ޒަމާނީ ޑިމޮކްރަސީއަކަށް އަޅުގަނޑުމެން ހޭލުންތެރިވެފައިވާ މިންވަރާމެދު އިތުރަށް ވިސްނާލަން މަޖުބޫރު ކުރުވި އެވެ.

ރައީސުލްޖުމްހޫރިއްޔާ ފުވައްމުލަކަށް ވަޑައިގެންނެވި ވަގުތު އެމަނިކުފާނަށް މަރުޙަބާ ދެންނެވުމަށް ބަނދަރަށް ވަޑައިގެން ތިއްބެވި ރަށުގެ ކަމުވޮށީންގެ ތެރޭގައި އިދިކޮޅު ޕާޓީތަކަށް ނިސްބަތްވެވަޑައިގަންނަވާ ގިނަ ކައުންސިލަރުންނެއް ފެންނާކަށް ނެތެވެ. ރައްޔިތުންނާއި ބައްދަލުކުރެއްވުމަށް ބޭއްވެވި ޖަލްސާއާއި އެކި ރަސްމިއްޔާތުތަކުންވެސް އިދިކޮޅު ޕާޓީތަކުގެ ކައުންސިލަރުން ފެނުނީ ވަރަށް މަދުންނެވެ. ރަސްމިއްޔާތުތަކުން ނުފެނުނީ ކީއްވެތޯ، ރަސްމިއްޔާތުތަކަށް ވަޑައިނުގަންނަވާ ބައެއް ކައުންސިލަރުން ގާތު އަޅުގަނޑު އަހާލީ މެވެ. "އެއީ ތިމަންނާމެންގެ ރައީސެއް ނޫން" ކަމަށް ބައެއް ކައުންސިލަރުން ވިދާޅުވިއެވެ.

އެއީ ރަނގަޅު ވާހަކަފުޅެއް ނޫނެވެ. ކެނެރީގޭ މުޙައްމަދު ނަޝީދަކީ މިއަދު ދިވެހި ރާއްޖޭގެ ރައީސުލް ޖުމްހޫރިއްޔާއެވެ. ހުރިހާ ދިވެހި ރައްޔިތުންގެ ވެރިމީހާއެވެ. ޑިމޮކްރެޓިކް ހަމަތަކުގެ މަތިން ބޭއްވުނު އިންތިޚާބެއްގައި ވާދަކުރައްވާ ކާމިޔާބު ހޯއްދެވި، ދިވެހިރާއްޖޭގެ މިއަދުގެ ވަލިއްޔުލް އަމުރެވެ.

މި ހަގީގަތް ގަބޫލުކޮށް ގައުމުގެ ރައީސުލްޖުމްހޫރިއްޔާއަށް އަދާކުރަންޖެހޭ އިހުތިރާމާއި ގަދަރު އަޅުގަނޑުމެން އަދާކުރަންވާނެވެ. އެމަނިކުފާނު ވެރިކަމަށް ވަޑައިގަތީ އެމްޑީޕީގެ ކެންޑިޑޭޓުގެ ހައިސިއްޔަތުންނަމަވެސް ވެރިކަމާހަމައަށް ވަޑައިގެންނެވުމުން އެމަނިކުފާނު ވާނީ ދިވެހިރާއްޖޭގެ ރައީސުލް ޖުމްހޫރިއްޔާއަށެވެ. ހަމައެކަނި އެމްޑީޕީ މެންބަރުންގެ ރައީސުލް ޖުމްހޫރިއްޔާއަކަށް ނޫނެވެ. ދިވެހި ހުރިހާ ރައްޔިތުންގެ ރައީސުލްޖުމްހޫރިއްޔާއަށެވެ. ދިވެހި ކޮންމެ ދަރިއެއްގެ ޝުޢޫރުތަކަށް ކަމޭ ހިތްތަވާ، ދިވެހި ކޮންމެ ރައްޔިތެއްގެ މި އަދުގެ ބެލެނިވެރިޔާ އަށެވެ. ރައީސުލްޖުމްހޫރިއްޔާގެ ކޮންމެ ދަތުރުފުޅެއްގެ، ކޮންމެ ބަސްފުޅެއްގެ، ކޮންމެ މަސައްކަތްޕުޅެއްގެ އަމާޒަކަށްވާނީ، މުޅި ދިވެހި ގައުމަށް، މުޅި ދިވެހި ރައްޔިތުންނަށް ލާބައާއި މަންފާ ހޯދައި ދިނުމެވެ. އަޅުގަނޑުގެ މި ބަހަށް ދިވެހި ރާއްޖޭގެ ޤާނޫނު އަސާސީ ހެކިވާނެ އެވެ. ހަމަ އެހެންމެ ކައުންސިލަރުންގެ ވެސް ޒިންމާތަކަކާއި ވާޖިބުތަކެއް ޤާނޫނު ވަނީ ކަނޑައަޅައިފަ އެވެ. އެމީހަކު އެ ނިސްބަތްވާ ދާއިރާއެއްގެ ރައްޔިތުންގެ މައްޗަށެވެ. ކުލައެއް ފިކުރެއް ބެލުމެއް ނެތި، ހުރިހައި ރައްޔިތުންގެ މައްޗަށެވެ.

ޙަޤީޤަތަކީ މިއީ ކަމަށްވާއިރު، މަޤާމުގެ ޒިންމާތައް ހުރިހައި މާނައެއްގައި އަދާކުރަން އެބަ ޖެހެއެވެ. އަމިއްލަ ޖަޒުބާތާ ދެކޭ ގޮތް އެއްފަރާތް ކޮށްފަ އެވެ. ދައުލަތުގެ ދޭދޭ ބާރުތައް އެއްފަރާތުން އަނެއް ފަރާތާ ގުޅުން ބަދަހި ކުރަން ޖެހެ އެވެ. އެހީތެރިކަން އޮންނަން ޖެހެ އެވެ. މަޝްވަރާ ބަދަލުވާން ޖެހެއެވެ. ހުރިހައި ފެންވަރެއްގަ އެވެ. ހުރިހައި ދާއިރާއެއްގަ އެވެ. ރައްޔިތުން ބޭނުންވާ ކުރިއެރުމާއި ތަރައްޤީ ހާސިލްވާނީ، ހެޔޮ ނިޔަތުގައި މި ގުޅުންތައް ހަރުދަނާ ކުރެވި ބަދަހިވެގެންނެވެ. ވަކި ފަރާތެއް އިސްތިސްނާ ކުރުމެއް ނެތި އެވެ. މިއީ ފަހަރެއްގައި ވެސް ތިމާ ނިސްބަތްވާ ސިޔާސީ ޕާޓީއަށް ވެވޭ ޚިޔާނާތެއްކަމަށް ދުށުމުގެ ޖާގަ އެއް ނެތެވެ.