ވޯޓް ދޭންވީ ކާކަށް، ވޯޓް ދޭނީ ކާކަށް

ލާމަރުކަޒީ އުޞޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ ބޭނުމަކީ، ދިވެހިރާއްޖޭގެ އެކި ރަށްރަށުގައި ދިރިއުޅޭ ރައްޔިތުންގެ ކަންކަން، ދިމިޤްރާޠީ އަދި ޖަވާބުދާރީވަނިވި އުޞޫލުން ރައްޔިތުން އަމިއްލައަށް ނިންމުމަށް މަގުފަހިކޮށް، އިޖުތިމާއީ ގޮތުންނާއި، އިޤްތިޞާދީގޮތުންނާއި، ޘަގާފީގޮތުން ދިވެހިރާއްޖޭގެ ރަށްރަށުގައި ދިރިއުޅޭ ރައްޔިތުންގެ ދިރިއުޅުމުގެ ފެންވަރު މަތިކޮށް، ރައްޔިތުން ބާރުވެރިކޮށް، ރައްޔިތުންނާ އެންމެ ގާތުން ފުޅާ ދާއިރާއެއްގައި ޚިދުމަތް ލިބޭނެ މަގު ފަހިކޮށްދީ، ދިވެހިރާއްޖޭގެ ރަށްރަށުގައި އަމާން ވެއްޓެއް ޤާއިމު ކުރުމެވެ.

މި މަގުޞަދުތައް ހާޞިލްކުރުމަށްޓަކައި ލާމަރުކަޒީ ޤާނޫނުގެ ދަށުން އުފައްދާފައިވާ ސިޓީ ކައުންސިލްތަކާއި، އަތޮޅު ކައުންސިލްތަކާއި، ރަށު ކައުންޞިލްތަކަކީ އަމިއްލަ ނަމުގައި ދައުވާ ކުރުމާއި، ދައުވާ ލިބިގަތުމުގެ ބާރު ލިބިފައިވާ އަދި އަމިއްލަ ނަމުގައި މުއާމަލާތް ކުރުމުގެ ހައިސިއްޔަތު ލިބިފައިވާ ވަކި ސިއްކައެއް އޮއްނަ ޤާނޫނީ ޝަހުޞެކެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމަށް އުފައްދާފައިވާ ކައުންޞިލްތަކަށް ބަލާއިރު އަތޮޅު ކައުންސިލަކީވެސް ވަރަށް ގިނަ މައްސޫލިއްޔަތުތަކަކާއި ބާރުތަކެއް ޤާނޫނުން ހަވާލުކޮށްފައިވާ ކައުންޞިލެކެވެ. ވަރަށް ގިނަ ޒިންމާތަކެއް އުފުލަންޖެހޭ ކައުންސިލެކެވެ.

އަތޮޅު ކައުންސިލްތަކުގެ މައްސޫލިއްޔަތުތަކާއި ބާރުތައް ލާމަރުކަޒީ ޤާނޫނުގައި ބަޔާންކޮށްފައިވާ އަށްވަނަ މާއްދާއަށް ބަލާއިރު ހ އިން ފެށިގެން ޒ ގެ ނިޔަލަށް މައްސޫލިއްޔަތުތަކާއި ބާރުތައް ބަޔާންކޮށްފައި ވެއެވެ. މި ބާރުތަކާއި މައްސޫލިއްޔަތުގެ ތެރޭގައި ހިމެނޭ ބައެއް ކަންތައްތަކަށް ބަލާއިރު ޤާނޫނު އަސާސީއާއި ޤާނޫނާ އެއްގޮތްވާ ގޮތުގެމަތިން އެ އިދާރީ ދާއިރާއެއް ހިންގައި، އެދާއިރާއެއް ތަރައްގީ ކުރުމަށް މަސައްކަތް ކުރުމާއި، ރައްޔިތުންގެ ބައިވެރިވުމާއެކު ރަށްރަށުގެ ތަރައްގީގެ ޕްލޭން ތަކަށާއި މުޅި އިދާރީ ދާއިރާގެ ތަރައްގީގެ މަޝްރޫއުތައް ރޭވުމުގައި ރައްޔިތުންގެ ޚިޔާލާއި މަޝްވަރާ ކަމާބެހޭ ފަރާތްތަކަށް ދިނުމާއި، ރަށު ކައުންސިލްތަކުން ހިންގާ ހަރަކާތްތައް ވިލަރެސް ކުރުމާއި އެ ކައުންސިލްތައް ހިނގާ ނުހިނގާގޮތް ބެލުމާއި، އިދާރީ ދާއިރާގެ ރައްޔިތުންގެ ނަމުގައި ނިންމަންޖެހޭ ކަންކަން ނިއްމުމާއި، ދާއިރާގެ ރައްޔިތުންގެ މާލިއްޔަތާއި އެންމެހާ ވަސީލަތްތައް ބެލެހެއްޓުން ހިމެނެއެވެ.

މީގެ އިތުރުން ފާހަގަކޮށްލެވޭ މުހިއްމު ކަންތައްތަކުގެ ތެރޭގައި އަތޮޅު ކައުންސިލަށް ލިބިދީފައިވާ ބާރާއި، މައްސޫލިއްޔަތު އަދާކުރުމަށްޓަކައި އެ ކައުންސިލެއްގެ އިޚްޞާޞްގައި ހިމެނޭ ކަންތައްތައް ތަންފީޒު ކުރުމަށް ބޭނުންވަ ޕްލޭންތައް ހެދުމާއި، ބަޖެޓް ތައްޔާރުކުރުމާއި، ތަރައްގީގެ މަޝްރޫއުތައް ރަށު ކައުންސިލްތަކުން ތަންފީޒު ކުރުމުގެ ކަންތައްތައް ހިނގާ ނުހިނގާ ގޮތް ބަލައި، އިދާރީ ދާއިރާގެ ފެންވަރުގައި އެކަށައަޅަންޖެހޭ ސިޔާސަތުތައް އެކަށައެޅުމާއި އެ ސިޔާސަތުތައް ތަންފީޒުކުރުމަށް ކުރަންޖެހޭ ކަންކަން ކުރުމާއި އެއާގުޅޭ ގަވާއިދު ހެދުން ހިމެނެއެވެ. އަދި ދިވެހިރާއްޖޭގެ ބިމާބެހޭ ޤާނޫނާއި އަދި އެނޫންވެސް ޤާނޫނުތަކުގައި ބަޔާންކޮށްފައިވާ ގޮތުގެމަތިން، އިޤްތިޞާދީ ނުވަތަ އިޖުތިމާއީ ބޭނުންތަކަށް ކައުންސިލްގެ ނަމުގައި ބިންބިމާއި ފަރާއި ފަޅު ހޯދުމާއި، މިފަދަ ތަންތަން އެހެން ފަރާތްތަކަށް ކުއްޔަށް ދޫކުރުމާއި، މިފަދަ ތަންތަނުގައި އިންވެސްޓްކުރުމާއި އަދި މި އިންވެސްޓްމަންޓްތައް ކައުންސިލްގެ ނަމުގައި މިލްކު ކުރުމުގެ ބާރުވެސް އަތޮޅު ކައުންސިލައް ލިބިފައި ވެއެވެ. މީގެ އިތުރުން ތަރައްގީގެ މަޝްރޫއުތައް ހިންގުމަށް ބޭނުންވާ ފައިސާ ހޯދުމަށް މުނިސިޕަލް ބޮންޑާއި، ބިލާއި މުނިސިޕަލް ސެކިއުރިޓީ ފަދަ އެކިއެކި މާލީ ސެކިއުރިޓީތައް އެކަށައަޅައި، އެފަދަ ސެކިއުރިޓީތައް ސްޓޮކް އެކްސްޗޭންޖް މެދުވެރިކޮށް ވިއްކުންފަދަ މިނޫންވެސް އެތައް ބާރުތަކަކާއި އެތައް މައްސޫލިއްޔަތުތަކެއް ލާމަރުކަޒީ ޤާނޫން އަތޮޅު ކައުންސިލްތަކާއި ހަވާލުކޮށްފައި ވެއެވެ.

އަތޮޅު ކައުންސިލަކީ މިފަދަ ޒިންމާދާރު، މިފަދަ ބޮޑެތި މަސައްކަތްތަކެއް ކުރަންޖެހޭ ކައުންސިލަކަށްވުމާއެކު ކައުންސިލްގެ މަންފާ ރައްޔިތުންނަށް ފުޅާ ދާއިރާއްގައި ރައްޔިތުން އެދޭގޮތަށް ލިބިގެންދާނީ އެ ކައުންސިލްގެ މެންބަރުންނަކީ މިފަދަ ކަންކަމަށް ލޯހުޅުވިފައިވާ، އިލްމީ ގޮތުންނާއި ތަޖުރިބާގެ ގޮތުން މި މުހިއްމު ޒިންމާތައް އަދާކުރެވޭ ފެންވަރުގެ ބަޔަކަށް ވެގެންނެވެ. އަތޮޅު ކައުންސިލްގެ މެންބަރުންނަކީ ގާބިލް ބަޔަކަށް ވެގެންނެވެ.

ފުވައްމުލަކު އަތޮޅު ކައުންސިލުން ހުސްވެފައިވާ ފުވައްމުލަކު މެދު ދާއިރާގެ ގޮނޑިއަށް މީހަކު އިންތިޚާބު ކުރުމުގެ ބައި އިލެކްޝަން ނޮވެންބަރ 19 އަށް ތާވަލް ކުރެވިފައިވާއިރު މިއީ މިކަމާމެދު ވަރަށް ފުންކޮށް ވިސްނާލަން ޖެހޭ ވަގުތެކެވެ. ވޯޓް "ދޭންވީ ކާކަށް، ވޯޓް ދޭނީ ކާކަށް" ރަނގަޅަށް ވިސްނެވުމަށްފަހު ގޮތެއް ނިންމަވާށެވެ. ވޯޓް ދިނުމުގައި ބަލަންވީ އެއީ ތިމާ ނިސްބަތްވާ ޕާޓީގެ މީހެއްތޯ ހެއްޔެވެ. އެއީ އާއިލީ މީހަކަށް ވާތީ ނުވަތަ ރައްޓެއްސަކަށް ވާތީ ވޯޓް ދޭންވީ ހެއްޔެވެ. ނޫންނަމަ އެންމެ ގިނަ ހަދިޔާ ދޭ މީހާއަށް ވޯޓް ދޭނީ ހެއްޔެވެ. އިލްމީ ގޮތުންނާއި ތަޖުރިބާގެ ގޮތުން އަތޮޅު ކައުންސިލްގެ ވާޖިބުތައް އަދާކޮށް ރައްޔިތުންގެ ކުރިއެރުމަށް މަސައްކަތް ކުރެވޭފަދަ މީހަކީ ކޮބައިތޯ ބެލުމަށްފަހު ވަކި ޕާޓީއަކަށް ނުބަލާ އެމީހަކަށް ވޯޓް ދިނުމަށް ނިއްމާނީ ހެއްޔެވެ.

ގޮތެއް ނިއްމުމުގެ ބާރު ލިބިފައިވަނީ ރައްޔިތުނަށެވެ. ވޯޓް ދިނުމުގެ ހައްގު ލިބިފައިވަނީ ރައްޔިތުންނަށެވެ. މިފަހަރު ގޮތެއް ނިއްމުމުގެ ބާރު މިއޮތީ ފުވައްމުލަކު މެދު ދާއިރާގެ ރައްޔިތުންނަށެވެ. ރައްޔިތުންނަށް އެންމެ ފައިދާ ހުރި ގޮތަކީ ކޮބައިތޯ ވިސްނަވާށެވެ. ހުރިހާ ރައްޔިތުންނަށް ފައިދާ ބޮޑީ ކައުންސިލަށް ބޮލެއް އިތުރުކޮށްލުންތޯ ނުވަތަ އިލްމީ ގޮތުންނާއި ތަޖުރިބާގެ ގޮތުން އެންމެ ގާބިލް މީހާއަށް ފުރުޞަތު ދިނުންތޯ ވިސްނަވާށެވެ. ކައުންސިލަރުންނަކީ ޕާޓީއަށް ޚިދުމަތް ކުރުން ގާނޫނުން ލާޒިމްކުރާ ބައެއް ނޫނެވެ. ކައުންސިލަރުންގެމައްޗަށް ލާޒިމް ވެގެންވަނީ ރައްޔިތުންނަށް ޚިދުމަތް ކުރުމެވެ. ރައްޔިތުންގެ ތަރަށްގީއަށް މަސައްކަތް ކުރުމެވެ. ވުމާއެކު އަދިވެސް އެއްފަހަރު ވިސްނަވާލައްވާށެވެ. "ވޯޓް ދޭންވީ ކާކަށް، ވޯޓް ދޭނީ ކާކަށް" ގޯހެއް ނުހައްދަވާށެވެ. ހެއްދެވޭ ގޯހުގެ ނަތީޖާ ވަރަށް ހިތިވެދާނެ އެވެ.