މިފަހަރުވެސް އިޖުތިމާއީ ރޫޙު އިސްކުރަމާ ހިނގާށެވެ

ފަހުގެ ތާރީޚެއްގައި ފުވައްމުލަކަށް އައި "އެންމެ ބޮޑު އީދަކީ" ލަފާ ފުރުމުގައި އެތައްސަތޭކަ އަހަރެއްވަންދެން ފުވައްމުލަކު ރައްޔިތުން ތަހައްމަލުކުރަމުންދިޔަ ހިތްދަތި ދުވަސްތަކަށް ނިމުމެއް ގެނެސްދީ، ލަފާފުރުމުގައި ހިނގާފައިވާ ބިރުވެރި ހާދިސާތަކުގައި ގެއްލި ދިޔަ އަގުހުރި ފުރާނަތަކާއި އަގުބޮޑު މުދާތަކުގެ ހަނދާންތަކާ ދުރަށް ފުވައްމުލަކު ރައްޔިތުން ގެންގޮސްދިން ބަނދަރު ހުޅުވުމުގެ ރަސްމިއްޔާތެވެ. އެ ރަސްމިއްޔާތަށް ފުވައްމުލައް ތައްޔާރުވަމުން ދިޔައިރު ފުވައްމުލަކުގެ އެންމެހާ ރައްޔިތުންގެ މޫނުމަތިން ފެންނަމުން ދިޔައީ އުފާވެރިކަމުގެ ހިނިތުންވުމެވެ. ރަށުގެ އާބާތުރަ ފިލުވާ، ރަށް ނަލަހެއްދުމުގައި ފައިއިނދޭފުރާން ފެށިގެން ކުޑައެއް ބޮޑެއްނެތި ރެއާދުވާލު އެންމެން ގުޅިގެން މަސައްކަތް ކުރަމުން ދިޔައީ ފޫހިކަމެއްނެތި އިޖުތިމާއީ ރޫޙުގައެވެ.

ބަނދަރު ހުޅުވުމުގެ ރަސްމިއްޔާތަށް ފުވައްމުލަކަށް ވަޑައިގެންނެވި އިއްޒަތްތެރިންނާއި އެންމެހާ މެހުމާނުން ފުވައްމުލަކުން ފުރައިގެން ދިޔައީ ފުވައްމުލަކު ރައްޔިތުންނަށް ތައުރީފް ކުރަމުންނެވެ. ފުވައްމުލަކު ރައްޔިތުންގެ މެހުމާނުދާރީއަށް ޝުކުރު އަދާކުރަމުންނެވެ.

އަހަރު ތަކަކަށްފަހު އަނެއްކާވެސް މިވަނީ އެފަދަ "ބޮޑު އީދެއް" ކުރިމަތިވެފައެވެ. 17 ވަނަ ސާކް ސަމިޓުގެ ރަސްމީ ހަރަކާތްތައް އައްޑޫ ސިޓީގައި ކުރިޔަށް ގެންދިއުމަށް ހަމަޖެހިފައިވާއިރު ސަމިޓުގެ ހަވާސާގެ ތެރެއިން ރޭވިފައިވާ ބައެއް ހަރަކާތްތައް ފުވައްމުލަކުގައިވެސް ކުރިޔަށް ދާނެ އެވެ. ސާކް ގައުމުތަކުގެ ކްރިކެޓް މުބާރާތެއް ނޮވެންބަރ މަހުގެ އެކަކުން ނުވަޔަކަށް ފުވައްމުލަކުގައި ބޭއްވުމުގެ ތައްޔާރީތައް ދަނީ ކުރެވެމުންނެވެ. ނޮވެންބަރ ތިންވަނަ ދުވަހު ކައިޓް ފެސްޓިވަލެއް ބޭއްވުމަށް ހަމަޖެހިފައި ވެއެވެ. އަދި ސާކް ސަމިޓްގައި ބައިވެރިވެވަޑައިގަންނަވާ ހެޑް އޮފް ސްޓޭޓުންގެ އަނބިއަނބި ކަނބަލުންނާއި، ފިރިފިރި ކަލުން ނޮވެންބަރ 11 ވަނަ ދުވަހު ފުވައްމުލަކަށް ޒިޔާރަތް ކުރުމަށް ހަމެޖެހިފައި ވެއެވެ. ފުވައްމުލަކު ރައްޔިތުންގެ އުއްމީދުތަކާ ގުޅިފައިވާ ފުވައްމުލަކު އެއާޕޯޓް މިމަހުގެ ފަހުކޮޅު ނުވަތަ ނޮވެންބަރ މަހުގެ ކުރީކޮޅު ހުޅުވުމުގެ އުއްމީދުވެސް މިހާރުވަނީ އާވެފައެވެ.

މި ހަރަކާތްތަކާއި ރަސްމިއޔާތުތަކުގައި ބައިވެރިވެވަޑައިގަތުމަށް ރާއްޖެއާއި ރާއްޖޭން ބޭރުގެ އެތައް އިއްޒަތްތެރިންނެއް ވަޑައިގަންނަވާނެ އެވެ. ހަރަކާތްތައް ކަވަރުކުރުމަށް ބޭރުގެ މީޑިއާތަކާއި ރާއްޖޭގެ މީޑިއާތަކުގެ ޓީމުތައް އައްނާނެ އެވެ. އެމީހުންގެ ކެމެރާތައް ފުވައްމުލަކުގެ ހުރިހާ ދިމާލަކަށް ފޯކަސް ކުރާނެއެވެ.

ވުމާއެކު ފުވައްމުލަކަކީ ސާފުތާހިރު ރީތި ރަށެއްގެގޮތުގައި މެހުމާނުން ސިފަކުރާނެ މާހައުލެއް އުފައްދަން އެބަޖެހެއެވެ. މިކަމަށްޓަކައި ހަޑިވެފައިވާ މަގުފާރުތަކުގައި ކުލަ ލުމާއި، ގޮނޑުވެފައިވާ ސަރަހައްދުތައް ސާފުކުރުންފަދަ މަސައްކަތްތައް ކުރަން އެބަހުއްޓެވެ. އެހެންކަމުން މިކަންކަން ކުރުމުގައިވެސް ބަނދަރު ހުޅުވުމުގެ ރަސްމިއްޔާތައް ތައްޔާރުވުމުގައި އަޅުގަނޑު މެން ދެއްކިފަދަ އިޖުތިމާއި ރޫޙެއް ދައްކަމާ ހިނގާށެވެ. ނޮވެންބަރ މަސް ފެށުމުގެ ކުރިން މިކަންކަން ނިއްމައިލުމަށް އެއް ރޫޙެއްގައި ފަށަމާ ހިނގާށެވެ. ރަސްމިއްޔާތުތަކަށް ބޭނުންވާ ވަޞީލަތްތައް ގާއިމު ކުރުމަށް ސަރުކާރުން ކުރަމުންގެންދާ ބުރަ މަސައްކަތްތައް ކަނޑައެޅިފައިވާ ތާރީޚްތަކަށް ނިއްމުމުގައި އަޅުގަނޑުމެންނަށް ކޮށްދެއްވެން ހުރި މަސައްކަތްތަކަކީ ކޮބައިތޯ ބަލާ އެހީތެރިކަން ފޯރުކޮށްދެމާ ހިނގާށެވެ.

ސާކް ސަމިޓުގެ ސަބަބުން އައްޑޫ ސިޓީއަށް ލިބިގެން ދިޔަފަދަ ތަރައްގީގެ ބޮޑެތި މަޝްރޫއުތަކެއް ފުވައްމުލަކަށް ނުލިބުނަސް އެއާޕޯޓް ހެދުންފަދަ ކުރިން ފެށިފައިވާ މަސައްކަތްތަކަށް އިތުރު ހަލުވިކަމެއް ލިބި، ކްރިކެޓް ސްޓޭޑިއަމް ހެދުންފަދަ އިތުރު މަޝްރޫއުތަކެއް ފެށިފައިވާ ވެއެވެ. ބައެއް މަގުތަކުގައި ތާރު އެޅޭނެ ކަމުގެ އުއްމީދު އާވެފައި ވެއެވެ. ފުވައްމުލަކަށް ލިބޭ ކޮންމެ ތަރައްގީއަކީވެސް ފުވައްމުލަކުގެ ހުރިހާ ރައްޔިތުންނަށް ލިބޭ ތަރައްގީ އެކެވެ. ފުވައްމުލަކަށް ލިބޭ ކޮންމެ ރީތި ނަމަކީވެސް ފުވައްމުލަކު ހުރިހާ ރައްޔިތުންނަށް ލިބޭ ރީތި ނަމެކެވެ. ވުމާއެކު މިފަހަރުވެސް އިޖުތިމާއީ ރޫޙު އިސްކުރަމާ ހިނގާށެވެ. ފުވައްމުލަކު ރައްޔިތުންނަކީ ގައުމީ ކަންކަމުގައި ބައިބައިވެފައިވާ ބައެއް ނޫންކަން ސާބިތުކޮށްދީ، މެހުމާނުންގެ ތައުރީފް ހޯދަމާ ހިނގާށެވެ.