ދިވެހި ގައުމީ ދިދަ، ސިޔާސީ ކުލަތަކުގެ ހިޔަނީގައި

ކޮންމެ ގައުމެއްގައިވެސް އެގައުމެއްގެ ގައުމީ ދިދައަށް ވަރަށް މަތިވެރި ޝަރަފަކާއި އިއްޒަތެއް ދެއެވެ. ގިނަ ގައުމުތަކުގައި ގައުމީ ދިދައަށް އިހްތިރާމު ކުރުން ކޮންމެ ރައްޔިތެއްގެ މައްޗަށް ގާނޫނުން ލާޒިމް ކުރުވާފައި ވެއެވެ. ދިދަ ބޭނުންކުރެވޭނެ ހާލަތްތަކާއި، ބޭނުންނުކުރެވޭނެ ހާލަތްތައް އަދި ބޭނުންކުރަންޖެހޭ ގޮތްތައް ބަޔާންކޮށް އެތައް ސަފުހާއެއްގެ މައްޗަށް އެކުލެވިގެންވާ ގާނޫނުތައް ހަދާފައި އެބަހުއްޓެވެ. ކަނޑައެޅިފައިވާ އުސޫލުތަކާ ހިލާފަށް ބޭނުންކޮށްފިނަ ނުވަތަ އިހްތިރާމު ކުޑަކޮށްފިނަމަ ކުއްވެރިވާގޮތަށް އެ ގަވާއިދުތަކާއި ގާނޫނުތަކުގައި ސާފު ބަހުން ބަޔާންކޮށްފައި ވެއެވެ.

އަޅުގަނޑުމެން ގިނަ ކަންކަމުގައި ނަމޫނާއަކަށްބަލާ އެމެރިކާގައިވެސް މިފަދަ ގަވާއިދުތަކާއި ގާނޫނުތައް އެބަހުއްޓެވެ. ދުނިޔޭގެ އެއްމެ ބޮޑު ޑިމޮކްރަސީކަމުގައިވާ އިންޑިޔާގައިވެސް އެބަހުއްޓެވެ. ގައުމީ ދިދަ ބޭނުންކުރަންވީގޮތާއި ބޭނުންކޮށްގެން ނުވާނެ ހާލަތްތަކާއި ބޭނުންކޮށްގެންނުވާނެ ގޮތްތައް ވަރަށް ތަފްޞީލްކޮށް މި ދެގައުމުގެ ގާނޫނުތަކާއި ގައިވާއިދުތަކުގައި ވެއެވެ. މި ދެގައުމުގެވެސް ދިދާގެ ގަވާއިދުތަކުގައި ބުނެފައިވާގޮތުން ގައުމީ ދިދައެއް ކައިރީ އެހެން ދިދައެއް ނުވަތަ ދިދައެއް ރަމްޒުވާފަދަ އެއްޗެއް ބޭނުންކުރާނަމަ ގައުމީ ދިދައަށްވުރެ އުހަށް އެ ދިދައެއް ނެގުމަކީ މަނާކަމެކެވެ. އަދި އެހެން ދިދައަކާއެކު ގައުމީ ދިދަ ބޭނުންކުރާނަމަ ގައުމީ ދިދައަށް ކަނާތްފަރާތުން އިސްކަން ދޭން ޖެހެއެވެ.

ދިވެހި ގައުމީ ދިދަ ގެންގުޅެންވީގޮތާއި ބޭނުންކުރަންވީގޮތް ބަޔާންކޮށް ލިޔެވިފައިވާ ގާނޫނެއް ނުވަތަ ގަވާއިދެއް ފެންނަން ނެތް ނަމަވެސް، ރާއްޖޭގައިވެސް އަމަލުކުރެވެމުން އައިސްފައިވަނީ ދުނިޔޭގެ އެހެން ގައުމުތަކުގައިވެސް އަމަލުކުރަމުންދާ ގޮތަށެވެ. ދިދައަށް އިހުތިރާމު ކުރުމުގެ ގޮތުން ގިނަ ކަންތައްތަކެއް އަޅުގަނޑުމެން އެންމެންވެސް ކުރަމުން ދިޔައީމުވެ. ގައުމީ ދިދައަށް ޚާއްޞަ އިޚްތިރާމަކާއި ގަދަރެއް ދެމުން ގެންދިޔައީމު އެވެ. ގައުމީ ދިދައަށްވުރެ އުހައް އެހެން ދިދައެއް ނުނެގުމާއި، ގައުމީ ދިދައަށްވުރެ އެހެން ދިދަތަކަށް އިސްކަން ނުދިނުމަކީ ލިޔެވިފައި ނެތެއްކަމަކު އަޅުގަނޑުމެން ހެޔޮހިތުން ގަބޫލުކޮށް، އަމަލުކުރަމުންދިޔަ އުސޫލުތަކެވެ. ނަމަވެސް މިއަދު މިކަން އޮތީ މިހެންތޯ ސުވާލުކޮށްލަން ޖެހެއެވެ. ގައުމީ ދިދައަށް މިހާރު އަޅުގަނޑުމެންނަށް އިހުތިރާމު ކުރެވޭތޯ އަމިއްލަ ނަފްސާ ސުވާލުކޮށްލުން ރަނގަޅުވާނެ އެވެ. ގައުމީ މުނާސަބަތުތަކުން ގައުމީ ދިދާގެ ކުލަތައް ފެންނަނީ ކިހާވަރަކަށްތޯ ފިކުރު ހިންގަވައިލަބައްލަވާށެވެ. ގައުމީ ދިދާގެ ކުލަތަކަކީ ކޮބައިކަން އޮޅޭ މިންވަރަށް އެހެން ކުލަތައް ގަދަވެގެންފައިވާކަން އިހުސާސް ނުކުރެވޭތޯ އެވެ. ދިވެހި ގައުމިއްޔަތުގެ ނިޝާން ކަމަށްވާ ދިވެހި ދިދައަށް އޭގެ ހައްގު މަގާމު އަޅުގަނޑުމެންނަށް އެބަދެވޭތޯ އެވެ.

އަޅުގަނޑުމެން އަބަދުވެސް ވަކާލާތު ކުރަމުން މިދަނީ އަޅުގަނޑުމެންނަކީ ތަންދޮރުދަންނަ ބައެއްކަމަށެވެ. ތަހުޒީބުވެފައިވާ ބައެއްކަމަށެވެ. "ނަން މަޝްހޫރު" ޑިމޮކްރަސީ އަޅުގަނޑުމެން ދިވެހި ގައުމަށް ގެނައީ ތަހުޒީބު ބައެއްކަމުގައި ބުނަމުއެވެ. ނަމަވެސް ދިވެހި ގައުމީ ދިދަ ބޭނުންކުރުމުގައި އަޅުގަނޑުމެންނަށް މިފެންނަނީ ތަހުޒީބު މަންޒަރުތަކެއް ނޫނެވެ. ދިވެހި ގައުމީ ދިދާގެ ކުލަތަކަށްވުރެ ގައުމީ މުނާސަބަތުތަކުގައިވެސް ސިޔާސީ ޕާޓީތަކުގެ ކުލަ ގަދަވެގެންދާ ފަހަރުތައް މިހާރު މަދެއްނޫނެވެ. އެފަދަ މުނާސަބަތަކުން ގައުމީ ދިދައަށް ޖާގައެއް ދެވުނު ނަމަވެސް ސިޔާސީ ޕާޓީތަކުގެ ކުލަތަކުގެ ހިޔަނީގައި ދިވެހި ދިދަ "ފިލައި" އިންނަން ޖެހެނީ މަދެއްކޮށެއް ނޫނެވެ. ރައްޔިތުންނށް ނިސްބަތްވާ ތަނެއްގެ ބިންގާ އެޅިއަސް، މުޅި ރައްޔިތުންނަށް ނިސްބަތްވާގޮތަށް ޖަލްސާއެއް ބޭއްވިޔަސް ފެންނަނީ ޕާޓީ ދިދައެވެ. ޕާޓީގެ ކުލަތަކެވެ. ގައުމީ ދިދައަށް ގައުމީ ކުލަތަކަށް ލިބެނީ ހަނި ފުރުޞަތެކެވެ. މިއީ ރަނގަޅު ގޮތްތޯއެވެ؟. މިއީ ރަނގަޅު ގޮތެއް ނޫނެވެ. ހުރިހާ ރައްޔިތުންނަށް ނިސްބަތްވާ ކަންތައްތަކުން ފެންނަންވާނީ ގައުމީ ދިދަ އެވެ. ގައުމީ ކުލަތަކެވެ.

މިއީ ހަމައެކަނި ޑީއާރުޕީއަށް ނިސްބަތްވާ މެންބަރުންގެ އެކަނި ގައުމެއް ނޫނެވެ. ހަމައެކަނި އެމްޑީޕީ މެންބަރުންގެ ގައުމެއްވެސް ނުމެ ނޫންމެއެވެ. ނުވަތަ އޭރެއްގައި ވެރިކަންކުރާ ޕާޓީއަށް ނިސްބަތްވާ މެންބަރުންގެ އެކަނި ގައުމެއްވެސް ނޫނެވެ. ހުރިހާ ޕާޓީތަކެއްގެ މެންބަރުންނާއި އެއްވެސް ޕާޓީއަކަށް ނިސްބަތްނުވާ ދިވެހިންގެވެސް ގައުމެކެވެ. ހުރިހާ ދިވެހިންގެ ގައުމެކެވެ. ވުމާއެކު ގައުމީ ދިދައަށް އޭގެ ފުރިހަމަ މަގާމު އަޅުގަނޑުމެން ދޭންޖެހޭނެ އެވެ. އިހުތިރާމް އަދާކުރަން ޖެހޭނެ އެވެ. އެއީ އަޅުގަނޑުމެންގެ ގައުމު ތަމްޞީލްކޮށްދޭ ގައުމިއްޔަތުގެ ފަޚުރުވެރި ނިޝާނެވެ. ވުމާއެކު ހިތަށްއެރިހާގޮތަކަށް އެ ދިދަ ބޭނުންކުރެވިގެން ނުވާނެ އެވެ. ހިތަށް އެރިހާ ގޮތެއް އެ ދިދަ އަށް ހެދިގެން ނުވާނެ އެވެ.