ބަންޑާރަ ކިޅި ސަރަހައްދުގައި ކޮށްފައިވާ އިމާރާތާއި އިމާރާތް ހިމެނޭ ބިން ކުއްޔަށް ދީފި

ފުވައްމުލަކު ބަންޑާރަ ކިޅި ސަރަހައްދުގައި ކޮށްފައިވާ އިމާރާތާއި އިމާރާތް ހިމެނޭ ބިން ފުވައްމުލަކު ސިޓީ ކައުންސިލުން ކުއްޔަށް ދީފިއެވެ. މިތަން 15 އަހަރުގެ މުއްދަތަށް ކުއްޔަށް ދީފައިވަނީ ފުވައްމުލަކުގެ ކުންފުންޏެއް ކަމުގައިވާ ކަލީކްސް ގްރޭންޑްއަށެވެ.

ސިޓީ ކައުންސިލުން ވިދާޅުވެފައިވާގޮތުގައި މިތަން ކުއްޔަށް ދިނުމުގެ މަޤްޞަދަކީ ރަށުގެ ޤުދުރަތީ ވެށި ސާފުތާހިރުކަންމަތީ ދެމެހެއްޓުމާއި، މިތަނުގައި ހެދިފައިވާ ބިނާތައް ބެލެހެއްޓުމާއެކު ސިޓީ ކައުންސިލްގެ އާމްދަނީ އިތުރު ކުރުމެވެ. އަދި ރަށުގެ އިޤްދިޞާދު ކުރިއަރުވައި ވަޒީފާގެ ފުރުޞަތު ރައްޔިތުންނަށް ފަހިކޮށްދިނުމެވެ.

ހިމާޔަތް ކޮށްފައިވާ ފުވައްމުލަކު ބަންޑާރަ ކިޅީގެ ހިތްގައިމު ވެށި ބަލައިލެވޭގޮތަށް އިމާރާތެއް ތަރައްޤީ ކުރީ 2011 ވަނަ އަހަރު އައްޑޫ ސިޓީގައި ބޭއްވި ސާކް ސަމިޓާ ދިމާކޮށެވެ. ސާކް ސަމިޓަށްފަހު މި އިމާރާތް ކުއްޔަށް ހިފައިގެން އަމިއްލަ ފަރާތަކުން ރެސްޓޯރަންޓެއް ހިންގާފައި ވެއެވެ. ފުރަތަމަ ކުއްޔަށް ހިފި ފަރާތުން ތަން ދޫކޮށްލުމުން ކުއްޔަށް ނުދީ އޮންނަތާ އެތައް އަހަރެއް ވުމުން ތަން ވަރަށް ބޮޑަށް ވީރާނާވެފައިވާތީ ސިޓީ ކައުންސިލުން ޚަރަދުކޮށްގެން ތަން ވަނީ ވަރަށް ބޮޑަށް މަރާމާތު ކޮށްފައެވެ. ނަމަވެސް މަރާމާތު ކުރިފަހުންވެސް ތަން ކުއްޔަށް ނުދެވި، އަދި ތަން ބެލެހެއްޓިފައި ނެތުމުގެ ސަބަބުން މިހާރުވެސްވަނީ ތަނަށް ބޮޑެތި ގެއްލުންތަކެއް ލިބިފައެވެ.