މަސްތުވާތަކެތީގެ މައްސަލައެއްގައި ތިން މީހަކު ފުލުހުންގެ ބެލުމުގެދަށަށް ގެންގޮސްފި

މަސްތުވާ ތަކެތިކަމަށް ތުހުމަތުކުރެވޭ އެއްޗެއް އަޅައިފައި ހުރި 51 ރަބަރު ހޮޅިކޮޅާއެކު 3 މީހަކު ފުވައްމުލަކު ޕޮލިސް ސްޓޭޝަންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް ޕޮލިސް ސަރވިސަސް އިން ހާމަކުރައްވާފައިވާ މައުލޫމާތުގައިވާގޮތުން ބުދަ ދުވަހުގެ ރޭ ފުވައްމުލަކު ޕޮލިސް ސްޓޭޝަންގެ ބެލުމުގެ ދަށަށް ގެންގޮސްފައިވަނީ ޏ.ފުވައްމުލަކު / ހޯދަނޑު. ޖޭމުމާގެ، ޙަސަން ޒަރީރު (30އ) އާއި ޏ.ފުވައްމުލަކު / ހޯދަޑު. އައްސޭރިމަންޒިލް، ޢަލީ އަޙްމަދު (34އ) އާއި ޏ.ފުވައްމުލަކު / ފުނާޑު. މިދިލިމާގެ، އަޙްމަދު ޙަސަން (34އ) އެވެ.

މަސްތުވާތަކެތީގެ މައްސަލައެއްގައި މި ތިން މީހުން ފުލުހުންގެ ބެލުމުގެ ދަށަށް ގެންގޮސްފައިވަނީ ފުވައްމުލަކު ބަނދަރު ސަރަހައްދުގައި ހަދާފައިވާ މަސްމާރުކޭޓް ކައިރީ ތިއްބާކަމަށް ފުލުހުން ބުނެއެވެ. ރަށުތެރެ ޕެޓްރޯލް ކުރަމުންދިޔަ ފުލުހުންނަށް މި ތިންމީހުން ފެނިގެން ޗެކު ކުރި ކުރުމުގައި މަސްތުވާތަކެތި ކަމަށް ތުހުމަތު ކުރެވޭ އެއްޗެއް އަޅައިފައިވާ ރަބަރު ހޮޅިކޮޅުތައް ފެނިފައިވަނީ ތިން މީހުންގެ ތެރެއިން އެކެއްގެ އަނގައިން ވައްޓާލި ކޮތަޅު ކޮޅެއްގެ ތެރެއިން ކަމަށްވެސް ފުލުހުން ބުނެފައި ވެއެވެ.